En feches recientes el Conceyu de Carreño, al traviés de la Biblioteca Pública Municipal “Carlos González Posada”, allugada en Candás, recibió una subvención de 1.412,44 € concedía a les entidaes locales per parte de la Conseyería d'Educación y Cultura  pa l'alquisición de llibros destinaos a les Biblioteques Municipales de la Rede de Biblioteques del Principáu d'Asturies. 

“Esta subvención, xuntu cola aportación municipal, va sirvir p'amontar el fondu de la nuesa biblioteca al traviés de la compra  de llibros tantu pa persones adultes como infantiles, faciendo especial fincapié nes novedaes apaecíes mientres los últimos meses. Determinaos sectores de la nuesa sociedá creen qu'invertir nel sector públicu y sobre too en cultura ye tirar el dineru nun sacu ensin fondu. Pero los gobiernos socialistes del Principáu d'Asturies y del Conceyu de Carreño creemos tolo contrario. Ye fundamental invertir, apostar por unos servicios de calidá, públicos y gratuitos, accesibles pa toles persones y n'especial p'aquelles, que poles sos circunstancies personales nun podríen optar a él, servicios qu'ameyoren la calidá de vida de la ciudadanía. Por ello ye necesariu que dende les alministraciones públicos faigamos un esfuerzu por consiguir meyores servicios pal vecinderu. Nesti sentíu, un claru exemplu del nuesu compromisu ye la Biblioteca Municipal cola alquisición de les últimes novedaes pa poneles a la disposición de la ciudadanía”–comentó Cecilia Tascón-Conceyala de Cultura.

Estos 1.412 € van xunisea los 13.700 € que dende'l Consistoriu apúrrese añalmente pa l'alquisición de fondos, llegando n'anguaño 2018 a devasar los 15.000€ que dende Carreño se destinen a la compra de llibros, cds, películes en dvd, prensa, revistes, actividaes de la Biblioteca Municipal. D'esta forma les inversiones previstes p'anguaño van ser:

-5.500€ pa l'alquisición de llibros de temática variada.

-5.500 € pa la compra de la prensa diaria y de les revistes selmanal y mensual.

-1.000€ na compra de cd`s de música y de películes variaes.

-1.500 € pal gastu d'oficina.

-1.800 € destinaos a les actividaes que dende'l Centru Municipal entámense como pue ser esposiciones, charres, cuentacuentos, concursu de marcapáxines,…

Les últimes alquisiciones de la Biblioteca Pública Municipal “Carlos González Posada”, ente otres fueron:

-Llibros p'adultos, la temática foi variada, como lo demuestra l'alquisición de “La Tentación del Perdón” de la estadounidense Donna Leon, que los sos llibros fueron traducíos a 23 idiomes; o “La Llamada de la Tribu” del Nobel de Lliteratura Vargas Llosa; pasando por “Qué Nadie Duerma” de Juan José Millás; o al recetariu de cocina “SuperFoods” de Carla Zaplana.

-Películes p'adultos, adquirióse Dvd de cintes que nel so estrenu cinematográficu fueron grandes ésitos de crítica y de taquilla como “Durkerque”, “Blade Runner” o “La Llibrera”, por casu.

-Películes Infantiles, la gran película de Disney-Pixar “Coco”, o “Trolls.

-Cuentos Infantiles, “Willy el perro casi verde” de Edu Flores, “Tigo y Tenga” de Lidia Sarria, ente otres alquisiciones.