Na Casa d'Alcuentros de les Muyeres de Carreño celebróse la charra-coloquiu Trata de muyeres: La esclavitú del s. XXI” cola collaboración de APRAMP (Asociación pa la Prevención y Reinserción de la Muyer Prostituyida).
Irene, representante y Trabayadora Social de APRAMP falónos del trabayu que vien desenvolviendo l'asociación por toa España y n'especial nel Principáu d'Asturies.
Ye una forma d'esclavitú moderna, una violación de los derechos humanos que constitúi un delitu contra la seguridá humana y contra la seguridá del Estáu.
La trata de persones ye un negociu ilícitu qu'en dellos casos aprovecha les corrientes migratories internacionales. L'enfoque, por tanto, pasa por prevenir, enxuiciar a autores y protexer a les víctimes considerando la seguridá de les persones y non puramente la seguridá del Estáu, asina recueye la APRAMP nel so guía de trabayu.
“Mientres la sesión informativa encetáronse temes como'l perfil de les muyeres trataes lo mesmo que de les persones tratantes, les formes en que son equí traíes estes muyeres na so mayoría provenientes de terceros países y n'ocasiones neñes, por aciu engaños, coacción, y amenaces” - esplicó Carlos Mediavilla, Axente d'Igualdá de Carreño.
“Tamién nos esplicaron el trabayu de l'asociación quien fai una importante llabor de campu diendo a elles a les muyeres, por que les conozan y amosa-yos sofitu pa llegáu'l momentu sían elles les que puedan dirixise a l'asociación. Dende APRAMP dáse-y una especial importancia a la cuestión formativa, por ello desenvuelven talleres empobinaos al empléu, por que estes muyeres una vegada consiguen salir puedan atopar un trabayu que-y dexe integrar #se na sociedá” - prosiguió l'Axente d'Igualdá.
Al rematar la charra proxectóse una campaña de l'asociación llamada Exit, que foi grabada xuntu a Mabel Lozano, onde se recueyen dellos casos de muyeres que consiguieron salir d'esta problemática y qu'agora tán totalmente reintegraes na sociedá.
Albandi
