El Conceyu de Carreño abre'l plazu pa solicitar un stand na XX edición de la Feria d'Artesanía de Candás que va celebrase na Plaza Hermanos Helio mientres los díes 9, 10 y 11 d'Agostu.

L'oxetivu d'esta feria ye dinamizar y rellanzar, amás de dar conocer l'actividá del sector artesanal, non solo local, sinón rexonal y nacional. Ye una feria empobinada a la promoción de l'artesanía polo que xunto cola ficha d'inscripción va ser imprescindible axuntar el documentu acreditativu de tar dáu d'alta anguaño nel  censu de profesionales de la artesanía de la comunidá o provincia que correspuenda.

“Dende l'área de Turismu entendemos que si'l fin del certame ye la promoción y espardimientu de productos ellaboraos artesanalmente vos y les participantes de la Feria d'Artesanía tienen qu'ellaborar artesalmente los sos productos, y que estos postreros tienen de responder a un procesu de tresformamientu y ellaboración d'una materia prima, entendiéndose esti procesu como un cambéu sustancial d'esta materia, polo qu'amás non s'almitirá la esposición y venta de productos que nun fueren especificaos na solicitú” señaló María Rosa Nodal-Conceyala de Turismu.

“L'axudicación de los 22 que salen a concursu va realizase ente toles solicitúes que cumplan con tolos requisitos, ente ellos, tar dáu d'alta na seguridá social, documentu qu'acredite tar dáu d'alta como artesanu/a o pa los puestos de gastronomía'l carné de remanador d'alimentos,.. y siempres atendiendo al orde d'entrada de la solicitú nel rexistru municipal, cola única salvedá que van tener prioridá aquellos artesanos y artesanes, y espositores que participaren con anterioridá en pasaes ediciones de la Feria y cumplan colos requisitos establecíos” comentó la Conceyala d'Área 

Les persones comenenciudes en participar tendrán de presentar la ficha d'inscripción oficial en dalguna de les siguientes maneres:
• Presencialmente nel Conceyu de Carreño, apurriendo la solicitú debidamente rellenada nel rexistru municipal de llunes a vienres nel horariu de 9:00 a 14:00 hores

• Per Corréu Postal Certificáu unviáu al Conceyu de Carreño- Conceyalía de Turismu c/ Santolaya, 1 y 3, Candás-Carreño, 33430.

• Telemáticamente, unviando la solicitú al corréu: registro@ayto-carreno.es.

Les tases que caúna de los artesanos y artesanes tendrán d'abonar por participar van ser:
• 20 euros p'Artesanos/es del conceyu de Carreño 

• 35 euros p'Artesanos/es del restu d'Asturies
• 80 euros p'Artesanos/es fora d'Asturies
• 30 euros p'Artesanos/es Gastrónomos/es
 
El plazu pa presentar solicitúes remata'l próximu vienres 19 de xunetu de 2019.

Les bases ya impresu pa solicitar stand pueden descargase na páxina web del Conceyu de Carreño, www.ayto-carreno.es.