Frutu de los llazos d'unión qu'a lo llargo de los años siempres caracterizó la relación ente Asturies y a Llión, l'alumnáu de les Escueles Rurales de Carreño y el CRA de Babia esfrutaron d'una xornada de convivencia na aula didáctica del CIR Monte Areo.

L'alumnáu de les Escueles Rurales d'El Valle-Quimarán y la de Llorgozana esfrutaron enantes d'una xornada educativa-cultural-festiva en tierra llionesa xuntu col alumnáu del CRA de Babia. La xornada dio empiezu con una ruta ente los pueblos babianos de Villasecino y Riolago p'acabar visitando'l Palaciu de Quiñones, see del Parque Natural de la Babia, Reserva de la Biosfera pola Unesco dende'l 2014.

La contorna lleonesa de Babia ta formada polos conceyos de Cabrillanes y San Emiliano xuntando ente dambos a 1.666 habitantes. El CRA de Babia atópase na localidá de Huergas de Babia. Ye un centru públicu billingüe , qu'educa a 33 neños y neñes d'Educación Infantil y Primaria.

Babia yera una zona escoyida polos Reis de Llión como puntu de reposu pa alloñar de los problemes de la corte. Estes ausencies del Rei motivaron de cutiu la molición de súbditos, a quien cuando se-yos preguntaba por él respondíen evasivamente que'l Rei taba en Babia, d'ende la espresión.

En cualquier competición por equipos, siempres hai un partíu d'ida y otru de vuelta, si llevamos esta semeyanza a esta actividá educativo y cultural,  nel CIR Monte Areo celebróse'l partíu de vuelta en Carreño.

El Conceyu de Carreño, en collaboración col personal docente de les Escueles Rurales del Conceyu, ellaboró una xornada na que los neños y les neñes de los trés conceyos afayaron, xugando, les especies autóctones de la flora del Monte *Areo.

A les 11:30 hores d'esti 15 de xunu foi la bienvenida a los 33 neños y neñes de Babia que nos visitaron. Y de siguío celebróse'l taller didácticu “Afayando'l Monte Areo” impartíu pola florista local Artumisa Alonso na Aula Didáctica del CIR “Monte Areo” na parroquia d'El Valle. 

La área del Monte Areo alluga la necrópolis tumular más importante del Norte d'España. En 1997 foi declaráu Bien d'Interés Cultural (BIC). Un túmulu ye un monumentu funerariu prehistóricu formáu polo xeneral por un montículo en que'l so interior apaez una cámara onde se deposita'l cadabre. Esta última estructura llámase dolmen y ta formada por bloques de piedra asitiaos verticalmente con otra piedra que sirve de tapa o cobertera. Los dólmenes del Monte Areo tán dataos aprosimao de fai 5.000 años. Na actualidá esisten más de 30 estructures partíes polos 7 km de llargor qu'ocupa la zona. Como complementu a la necrópolis  tiense una aula didáctica del Neolíticu, que nos dexa conocer un poco más sobre esi períodu tan alloñáu.  

L'alcuentru escolar celebróse nesta aula participando un total de 54 neñes y neños, 33 pertenecientes al CRA de Babia y 21 de les Escueles Rurales del Conceyu.

L'oxetivu principal d'esta actividá didáctica “Afayando'l Monte Areo” foi la de dar a conocer al alumnáu que nos visita como al de les nueses escueles rurales les especies autóctones de la zona (flores, frutos, plantes verdes,...) y más concretamente les del Monte Areo. Pa ello realizaron un arreglu floral con elementos que primeramente fueron recoyíos nel BIC. Unes especies que se-yos dieron a conocer, esplicando tipos, familia proveniente característiques, necesidaes,.. a participantes, y que ellos y elles van poder utilizar pa diseñar los sos trabayos florales o decorativos.