El Sábadu, 14 de Marzu, les tables del Teatru Prindes volverán cimblar col soníu melódicu de les Habaneres y del Cantar Marineru nel IV Certame Infantil y Xuvenil de la modalidá que se celebra en Candás patrocináu pol Conceyu de Carreño.
Cuatro coros procedentes de Valladolid, Madrid, Pontevedra y Asturies van ser los encargaos de convertir al coliséu candasín nuna fábrica de conserva y salazón, onde yera habitual oyer esti tipu de cantares.
Los cuatro coros van tener qu'interpretar caúnu cuatro obres, dos d'elles va ser de llibre elección, otra del repertoriu internacional o de la so rexón d'orixe, empezando pol tema obligáu, l'habanera “El ABANICO” con arreglos del maestru M. Martínez Guirao, que tendrá de ser interpretada “ a cappella”. Obra inédita que va ser estrenada nesti III Certame.
L'habanera ye un xéneru musical aniciáu en Cuba na primer metá del sieglu XIX. Nel so orixe yera fundamentalmente un cantar románticu d'amores y desamores, anque la guerra d'Independencia de finales del sieglu XIX dio-y un calter patrióticu, reivindicativu, los marinos que dende la tabierna cantaben llenos de añoranza pela tierra cubana y de munchos amores dexaos ellí.
“Col IV Certame Xuvenil d'Habaneres damos continuidá al trabayu empecipiáu por José Ramón González Muñiz nel 2012 col Certame de Cantares de la Bodega. Pretendemos siguir recuperando, calteniendo y promocionando toos aquellos cantares populares qu'en dalgún momentu cantábense mientres el trabayu nes fábriques de conserva y salazón. Y ye por ello que'l Premiu Especial del Públicu lleva'l nome del so impulsor” señaló Juanjo Fernández- Conceyal de Cultura-.
“Los cuatro coros que van participar nesta edición son el coru del “IES A Xunquera I” de Pontevedra; el coru Infantil “Las Veredas” de Madrid; el coru “In crescendo Young Singers” de Valladolid; y el coru “Arsis” d'Asturies. Nesta nueva edición de nuevu volvemos cuntar con 4 participantes, yá que por cuenta de la calidá de los coros fíxose bien difícil faer una primer selección” comentó'l conceyal.
.- Coru del “IES A Xunquera I” de Pontevedra. So la dirección de María Luisa Sánchez. Compuesto pol alumnáu y ex alumáu del centru, polo que la franxa d'edá va dende los 11 a los 20 años. Publicaron dos discos “Nenos do Jazz” y “Son Xunqueira”. Nel 2018 alzóse col primer puestu nel V Certame Nacional de Coros Escolares entamáu pol Ministeriu d'Educación, nel 2019 consiguieron un tercer puestu.
.- Coru Infantil “Las Veredas” de Madrid. So la dirección d'Enrique Martín. Esti coru naz nel 2005 nel senu del Colexu Públicu Las Sendas de Madrid, desenvolviendo dende entós una intensa llabor de fomentu de la música coral ente la infancia y mocedá d'edaes ente los 9 y 19 años d'edá. Grabó dos trabayos discográficos “Nube” y “Colores”. Tienen nel so palmarés un segundu y tercer premiu nel Certame Internacional de Torrevieja, cinco primeros premios en Certames Nacionales de Coros y siete primeros premios nel Certame de Coros Infantiles de la Comunidá de Madrid.
.- Coru “In crescendo Young Singers” de Valladolid. Ta dirixíu por Sergio Casorrán, Ye un coru fundáu en marzu de 2012 y ta formáu por 50 cantantes d'edaes entendíes ente los 9 y 15 años integrantes de distintos colexos de la ciudá. Nel 2016 consiguen el segundu premiu del Concursu Nacional de Coros, y el tercer puestu na 47 edición del Certame Coral de Ejea de los Caballeros.
.- Coru “Arsis” d'Asturies. So la dirección de Cristina Langa Menéndez. Ta compuestu namá poles voces femenines, con edaes entendíes ente los 9 y los 19 años d'edá pertenecientes a la Escuela de Música Divertimento. Esti centru empieza la so andadura n'ochobre de 1993.
Albandi
